繼續同史友們介紹一啲歷史上嘅趣聞，歷朝歷代嘅婚姻都係講求門當戶對，特別係皇公貴族之間嘅婚姻，就更加講求雙方嘅關係對等，做得駙馬嘅都必然係朝中大臣嘅後代。之不過，明朝駙馬唔單止多數都唔係官員嘅後代，甚至仲專門喺民間進行選拔，到底當中有咩原因？
喺明朝嘅時候，每逢有公主要出嫁，朝廷都會為佢哋舉辦一場盛大嘅選駙馬活動，當中嘅條件除咗會列明北京戶口優先、相貌好、家教好之外，仲有一個相當重要嘅要求，就係參選嘅男子都必須係出身平民或者係低階官員嘅家庭。當以上所有條件都符合之後，皇帝就會派出司禮太監、欽天監官員做評審，再核對參選者嘅家庭背景與生辰八字。最後入名嘅三人就會交由皇帝選出正式嘅駙馬，接受國子監皇室禮儀培訓。
咁問題嚟喇？點解明朝皇帝偏偏就要公主嫁畀平民呢？要知道明朝嘅皇帝係相當驚有謀反之事發生，而歷史上有唔少出身權貴家庭嘅駙馬、外戚都會利用呢種姻親關係建立勢力，威脅皇室，所以唯有將公主下嫁畀平民，先至可以減低呢種事發生嘅可能，真係估佢唔到！
原圖嚟自網絡